Bjöllur, t.d. kúabjöllur, eru til í ótal stærðum og gerðum. Yfirleitt er slegið á þessi hljóðfæri með kjuðum eða sleglum og oft eru þau fest upp á sérstaka standa.

Bjöllurnar eru yfirleitt holar að innan og eru yfirleitt gerðar úr málmi - en þó eru til bjöllur úr horni, gleri, leir eða tré. Eins og við munum átti meginhluti titringsins og hljóðsins sér upptök í miðjunni á gongi - en á bjöllum verður hljóðið aðallega til á brún hljóðfærisins.
Blokkir eða stokkar eru hol hljóðfæri sem slegið er á með sleglum. Þau eru yfirleitt úr tré eða málmi. Þau gefa frá sér hvell hljóð sem oftast eru notuð sem gegnum gangandi taktur eða til áhrifaauka í tónlist.

Chimes eða klukknahljómur eru hljóðfæri sem samanstanda af fjölmörgum, misstórum, holum járnpípum. Þær hanga í einhverskonar festingum, ýmist í beinni röð - eins og sést hér efst á þessari mynd - eða í hring - eins og sést á neðar á myndinni.

Chimes gefa frá sér fallegan, draumkenndan hljóm og auk þess að vera vinsælt áhrifahljóðfæri - eru þau oft hengd upp utandyra og vindurinn látinn spila á þau.
Claves eru tréstangir sem slegið er saman. Hvellt hljóð kemur úr þessu hljóðfæri.
Hristur eru til í fjölmörgum tegundum. Yfirleitt eru þetta holir stokkar eða pípur. Í þá eru sett hrísgrjón eða annað smálegt sem myndar hljóð þegar stokkurinn er hristur.
Þríhorn eru notuð nokkuð í sinfóníutónlist. Tónn þeirra er bjartur og að mati margra, mjög fallegur. Hljóðfærið er yfirleitt úr járni og slegið er á það með járnstöng. Hljóðfærið er yfirleitt ekki notað mikið í hverju tónverki - en þar sem það kemur inn er það yfirleitt mjög mikilvægur áhrifaauki.

Allar myndir á þessari síðu / Efst á síðu